logo

НИШАСТИ МАТБУОТӢ ДАР ДОНИШКАДАИ САЙЁҲӢ, СОҲИБКОРӢ ВА ХИЗМАТ

      Санаи 24-уми июли соли 2020 дар Донишкадаи сайёҳӣ, соҳибкорӣ ва хизмат нишасти матбуотӣ доир гардид, ки дар он намояндаи Вазорати саноат ва технологияҳои нави Ҷумҳурии Тоҷикистон, аъзоёни раёсати донишкада, сардорони шуъбаҳо, раисони Созмонҳои ҷамъиятӣ, кормандони қисми таълиму тарбия, илм ва инноватсия, равобити хориҷӣ, декани факултетҳо ва беш аз 45 нафар намояндагони васоити ахбори омма  иштирок  намуданд.

       Ректори Донишкадаи сайёҳӣ, соҳибкорӣ ва хизмат муҳтарам Асрорзода Убайдулло Саттор қабл аз оғози нишасти матбуотӣ намояндагони васоити ахбори оммаро ба донишкада хайрамақдам гуфта, барои иштирокашон арзи сипос ва миннатдорӣ намуданд.

      Дар идомаи гузориши хеш оид ба фаъолияти таълимию тарбиявӣ, илмию байналмилалӣ ва хоҷагидорию иқтисодӣ дар нимаи аввали соли 2020 ректори донишкада аз Паёми имсолаи Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар шуда қайд намуданд, ки “Роҳбарону кормандони соҳаи маорифро зарур аст, ки дар баробари чунин дастгириҳои давлат ва афроди ватандӯст сатҳу сифати таълимро дар ҳар як муассисаи таълимӣ, сарфи назар аз шакли моликияти онҳо ва дар ҳамаи зинаҳои таҳсилот баланд бардоранд”.

     Зимнан, ректори донишкада бо дилу нияти неки созанда иброз намуданд, ки ҳайати коллективи меҳнатии Донишкадаи сайёҳӣ, соҳибкорӣ ва хизмат бо руҳу илҳоми тоза ва дилгармӣ ба кору фаъолият нимаи аввали соли 2020-ро сипарӣ намуд, зеро ба хотири муҳайё кардани шароити муосири таълимӣ барои тарбияи кадрҳо дар Паёми навбатии хеш Президенти Ҷумҳурии Тоҷикистон муҳтарам Эмомалӣ Раҳмон пешниҳод намуданд, ки дар заминаи Донишкадаи соҳибкорӣ ва хизмат Донишкадаи сайёҳӣ, соҳибкорӣ ва хизмат таъсис дода шавад. Чунин ташаббус ва боварии Сарвари давлат ба ҳайати омӯзгорону кормандон ва донишҷӯёни донишкада руҳу илҳоми тоза бахшид.

     Қайд гардид, ки нимаи аввали соли 2020 барои ҳайати илмӣ-омӯзгорӣ, кормандон ва донишҷўёни донишкада давраи хеле хотирмон мебошад, зеро он бо ҳодисаҳои муҳими сиёсӣ ва иҷтимоӣ-фарҳангӣ, аз ҷумла таҷлили 27-умин солгарди таъсисёбии Қувваҳои Мусаллаҳи Ҷумҳурии Тоҷикистон,  Рӯзи модар, ҷашни Наврӯзи байналмилалӣ — 2020 ва дигар ҳодисаҳои иқтисодиву сиёсӣ алоқаманд мебошад.

     Бо Қарори Ҳукумати Ҷумҳурии Тоҷикистон аз 29 апрели соли 2020, №240  дар бораи муассисаи давлатии таълимии “Донишкадаи сайёҳӣ, соҳибкорӣ ва хизмат” номи  муассисаи давлатии таълимии “Донишкадаи соҳибкорӣ ва хизмат” ба муассисаи давлатии таълимии “Донишкадаи сайёҳӣ, соҳибкорӣ ва хизмат” иваз карда шудааст. Вобаста ба ин сохтори идоракунии донишкада тағйир дода шуда, шуруъ аз оғози соли таҳсили 2020-2021 амалӣ карда мешавад. Баҳри иҷрои дастуру супоришҳои Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар соҳаи иҷтимоӣ ва бунёди ҷойҳои нави корӣ дар ҷадвали басти вазифаҳо аз рӯйи сохтори нави ташкилӣ-идоракунии донишкада ҳудуди 51 ҷойи нави иловагии корӣ таъсис дода шуд.

     Инчунин, бо мақсади баланд бардоштани сифати таҳсилот ва муайянсозии воқеияти дониши донишҷӯён дар оғози нимсолаи дуюми соли таҳсили 2019-2020 Маркази тестии қабули имтиҳонҳо таъсис дода шуда, он бо тамоми технологияҳои муосир ҷиҳозонида шудааст. Бояд ёдрас шуд, ки имтиҳонҳои фосилавии нимсолаи дуюми соли таҳсили 2019-2020 бо усули нави электронӣ қабул карда шуд.

    Дар ин давра дар асоси Қонуни Ҷумҳурии Тоҷикистон “Дар бораи муроҷиати шахсони воқеӣ ва ҳуқуқӣ” аз  23 июни соли 2016 ба раёсати донишкада тавассути шуъбаи умумӣ ва назорат  ҳуҷҷатҳо ворид гардидаанд. Дар 6 моҳи фаъолият тавассути шуъба ба донишкада 495 мактуб ворид гардида, 430 мактуби содиротӣ ирсол гардидааст.

  Ҳамчунин, ба унвонии раёсати донишкада тавассути шуъбаи умумӣ ва назорат 1819 адад ариза, гузориш, пешниҳод, муроҷиати шаҳрвандон, дархост ва хулосаи ҳуқуқшиноси донишкада ворид гардидааст, ки ҳамаи онҳо ҳаллу фасл гардида, ба шахсони масъул саривақт дастрас гардонида шудаанд.

   Вобаста ба фаъолияти Шўрои олимони донишкада, ҳамчун мақоми олии идоракунӣ ректори донишкада муҳтарам Асрорзода У.С. қайд намуданд, ки дар шашмоҳаи аввали соли 2020 — 4 ҷаласаи Шўрои олимони донишкада тибқи нақшаи корӣ ва 4 ҷаласаи Шӯрои олимони ғайринавбатӣ доир гардид, ки дар он 64 масъала, аз ҷумла, 33 масъалаи асосӣ ва 31 масъалаи ҷорӣ мавриди баррасӣ ва муҳокима қарор дода шуда, доир ба онҳо қарорҳои дахлдор қабул гардиданд.

   Илова бар ин, доир ба ҷаласаҳои ректорат ва ҷаласаҳои назоратии назди ректотри донишкада, ки 289 масъаларо дар бар мегиранд, ибрози назар карда шуд.

    Вобаста ба фаъолияти самти таълим дар давраи ҳисоботӣ ректори донишкада иброз доштанд, ки раёсати таълим яке аз сохторҳои марказии идории Донишкадаи сайёҳӣ, соҳибкорӣ ва хизмат буда, дар раванди таъмини сифати таҳсилот нақши ҳалкунанда дорад. Давоми давраи ҳисоботӣ раёсат ҷиҳати таъмини низоми босифати таҳсилот силсилаи тадбирҳои нақшавӣ ва ҷориро амалӣ намудааст, ки чунин натиҷаҳои фаъолият ба даст омадааст:

  • ҷиҳати пешбурди раванди таълим аз рӯи ихтисосҳои риштаҳои сайёҳӣ ва соҳибкорӣ иҷозатнома гирифта шуда, шуруъ аз соли нави таҳсил донишҷӯён аз рӯи ин ихтисосҳо ба таҳсил фаро гирифта мешаванд;
  • дар ин давра аз фанҳои таълимии бахшҳои гуманитарӣ, иқтисодию иҷтимоӣ ва табиатшиносию риёзӣ 22 адад китоби дарсӣ, васоити таълимӣ ва дастури методӣ аз фанҳои гуногуни таълимӣ таҳия ва нашр гардиданд;
  • раёсати таълим Стандартҳои таҳсилоти олии касбиро аз рӯи 23 ихтисоси амалкунандаи донишкада бо дарназардошти талаботи меъёрҳои байналмилалии таҳсилоти олии касбӣ таҷдиди назар намуда, барои ташхис ба Маркази ҷумҳуриявии таълимию методии назди Вазорати маориф ва илми Ҷумҳурии Тоҷикистон ирсол намуд;
  • дар нимсолаи аввали соли 2020 ду маротиба дар гуруҳҳои таълимӣ-академӣ мониторинги сифати таҳсилот гузаронида шуд, ки тибқи натиҷаҳо донишазхудкунии донишҷӯёни донишкада ба 83,1 % расида, ин нишондиҳанда нисбат ба ҳамин давраи соли гузашта 0,2% баландтар мебошад;
  • дар ин давра бо дархости донишкада ба мақоми ваколатдор дар ноҳияи Варзоб барои ташкили Маркази омӯзишӣ-таҷрибаомӯзии “Сайёҳ” барои донишкада қитъаи замин ҷудо карда шуд, ки пас аз омодагии ҳамаҷониба таҷрибаомӯзии донишҷӯён маҳз дар Маркази мазкур сурат хоҳад гирифт;
  • дар ин давра дар донишкада миқдори компютерҳо ба 719 адад расонида шуд, ки ба ҳар 4,3 донишҷӯ як компютер рост меояд;
  • дар нимасолаи аввали соли 2020 барои таъмини моддӣ-техникии раванди таълим 12 синфхонаи компютерӣ ва 2 синфхонаи лингофонӣ мавриди истифода қарор дода шуд;
  • дар нимаи аввали соли 2020 масоҳати таълимии донишкада васеъ карда шуда, шумораи ҷойҳои нишаст ба 4496 адад расонида шуд;
  • дар ин давра бо дарназардошти васеъ намудани масоҳати таълимии донишкада ва тақвият бахшидан ба пойгоҳи моддӣ-техникӣ ва таълимӣ-методӣ нақшаи қабул барои соли таҳсили 2020-2021 ба теъдоди 210 нафар зиёд карда шуд.

  Ректори донишкада муҳтарам Асрорзода Убайдулло Саттор самти илм ва инноватсияро самти калидии муассисаи таҳсилоти олии касбӣ унвон намуда, иброз доштанд, ки дар нимаи аввали соли 2020 раёсати илм ва инноватсияи донишкада тибқи нақшаҳои тасдиқнамуда фаъолияти худро ба роҳ монда, дар ин давра дар самти фаъолияти илмӣ-тадқиқотӣ ва инноватсионии донишкада натиҷаҳои назаррас ба даст омаданд. Аз ҷумла:

  • дар ин давра 6 монографияи илмӣ, 3 китоби дарсӣ, 5 васоити таълимӣ, 14 дастури методӣ, 3 рисолаи илмӣ, 215 мақолаи илмӣ, аз ҷумла 29 мақолаи илмии дар маҷаллаҳои илмии аз ҷониби КОА-и назди Президенти Ҷумҳурии Тоҷикистон тақризшаванда, 148 мақолаи илмии дар маводи конфронсҳои байналмилалӣ ва ҷумҳуриявӣ ва 38 мақолаи илмӣ-оммавӣ нашр гардид;
  • бо мақсади иҷрои Амри Президенти Ҷумҳурии Тоҷикистон муҳтарам Эмомалӣ Раҳмон аз 5 феврали соли 2020, №АП-1339 дар бораи озмуни ҷумҳуриявии “Фуруғи субҳи доноӣ китоб аст” дар донишкада озмуни мазкур дар сатҳи баланд ҷамъбаст гардид. Дар даври донишкадавии озмун ғолибони даври факултетӣ аз ҳисоби донишҷӯёни донишкада 24 нафарро ташкил ва баъд аз натиҷагирӣ 3 нафар донишҷӯ ва 2 нафар хонанда ғолиби озмун ҳисобида шуда, бо “Ифтихорнома”-и  Донишкада сарфароз гардонида шуданд ва барои иштирок дар давраҳои минбаъда дар сатҳи ноҳиявӣ ва шаҳрӣ  тавсия карда шуданд;
  • дар ин давра иҷрои барномаҳои давлатии соҳаҳои илм, таълим ва тарбия, аз ҷумла татбиқи чорабиниҳо вобаста ба “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” саривақт ба роҳ монда шуда, корҳои илмӣ-таҳқиқотӣ, фаъолияти маҳфилҳо ва семинарҳои илмӣ-назариявии кафедраҳо тақвият бахшида шуданд;
  • дар доираи таҷлили сазовори ҷашни 5500-солагии Саразми бостонӣ аз ҷониби раёсати донишкада нақшаи чорабиниҳо таҳия ва тасдиқ карда шуда, дар ин давра 2 конфронс ва 1 мизи мудаввар баргузор гардид. Ҳамчунин, аз ҷониби устодони донишкада вобаста ба ин санаи муҳими таърихӣ 1 монография ва 28 мақолаи илмӣ-оммавӣ нашр карда шуд;
  • дар нимсолаи якуми соли 2020, 3 нафар устодони донишкада рисолаҳои номзадии худро ҳимоя намуданд. Инчунин, 4 нафар устодони донишкада ҳимояи пешдифоиро аз кафедраҳо гузашта, ба Шӯроҳои диссертатсионӣ рисолаҳои илмии худро пешниҳод намуданд.Ҳамзамон, 3 нафар устодони донишкада унвони илмии дотсенти кафедраро соҳиб гардиданд;
  • дар олимпиадаи донишҷӯёни муассисаҳои таҳсилоти олии кишвар барои дарёфти Ҷоми Академияи илмҳои Ҷумҳурии Тоҷикистон 6 нафар донишҷӯи донишкада иштирок намуда, 1 нафар соҳиби ҷойи 3-юм аз фанни технологияҳои иттилоотӣ ва 3 нафар соҳиби ҷойҳои ифтихорӣ гардиданд;
  • дар нимсолаи якуми соли 2020 4 конфронси ҷумҳуриявӣ, 1 ҳамоиши илмӣ, 11 семинари илмӣ-назариявӣ, 2 мизи мудаввар ва 7 чорабиниҳои гуногуншакли илмӣ баргузор гардид, ки оид ба натиҷаи ҷамъбасти онҳо бо хулосаю пешниҳодот ба мақомотҳои дахлдор маълумотнома фиристода шуд;
  • дар нимаи аввали соли 2020 бо дарназардошти эълон гардидани “Солҳои рушди деҳот, сайёҳӣ ва ҳунарҳои мардумӣ” ҷамъияти илмии донишҷўёни донишкада фаъолияти худро пурсамар ба роҳ монда, хатсайрҳои нави сайёҳии дохилии Душанбе — Дараи Ромит, Душанбе–Дараи Сиёма-Қаратоғ, Душанбе-Қаратоғ, Душанбе-Норак-Данғара-Ховалинг-Сарихосорро таҳия намуданд ва ҷиҳати истифода ба ширкатҳои сайёҳии ватанӣ пешниҳод карданд.

     Вобаста ба самти робитаҳои хориҷӣ, ректори донишкада зимни гузориши хеш тақвияти робитаҳоро бо донишгоҳу донишкадаҳо ва марказҳои илмӣ-таҳқиқотии ватанию байналмилалӣ бориз арзёбӣ намуданд.

    Қайд гардид, ки Раёсати донишкада барои сафарбар намудани омўзгорону донишҷўён  дар чорабиниҳои гуногуни сатҳи дохилию байналмилалӣ дар ин давра саҳми хешро гузошт. Аз ҷумла, дар доираи ҳамкориҳои байналмилалӣ бо макотиби олӣ ва муассисаҳои илмӣ дар нимсолаи аввали соли 2020 2 нафар омӯзгорони донишкада ба Донишгоҳи илмҳои татбиқии Бредаи Нидерланд сафари корӣ анҷом дода, такмили касб намуданд.

  • дар ин давра иҷроиши Лоиҳаи “Рушди таҳсилоти олӣ дар Тоҷикистон”, барномаҳои грантии “Омода намудани кадрҳо бо мақсади рушди устувори сайёҳӣ дар Ҷумҳурии Тоҷикистон” ва “Баланд бардоштани сифати таҳсилот дар асоси истифодабарии муҳити иттилоотию таҳсилотии электронӣ дар Донишкада” бомуваффақият идома дода шуд. Дар доираи барномаи грантии “Омода намудани кадрҳо бо мақсади рушди устувори сайёҳӣ дар Ҷумҳурии Тоҷикистон” дар шашмоҳаи аввали соли 2020 лабораторияҳои “Иттилоотӣ-сайёҳӣ” ва “Сервиси сайёҳӣ-меҳмондорӣ” таъсис дода шуда, бо таҷҳизоти муосири иттиллотӣ ва сайёҳиву меҳмондорӣ ҷиҳозонида шуданд;
  • дар шашмоҳаи аввали соли 2020 ҳамчунин барои дарёфти грантҳо тавассути маблағгузории Бонки Осиёии Рушд, Бонки исломии рушд ва Эрасмус + корҳои муайяне сурат гирифта истодаанд. Бо мақсади фароҳам сохтани пойгоҳи мустаҳками таълимӣ-таҷрибаомӯзӣ раёсати Донишкадаи сайёҳӣ, соҳибкорӣ ва хизмат ҷиҳати бунёд ва ҷиҳозонидани Маркази таълимӣ-таҷрибаомӯзии сайёҳӣ ва меҳмондорӣ дар чорчӯбаи лоиҳаи “Тақвияти таҳсилоти касбӣ-техникӣ ва омӯзиш”, ки бо маблағгузории Бонки Осиёии Рушд (БОР) амалӣ шуда истодааст, корҳои муайянро анҷом дода истодааст;
  • дар ин давра баҳри ташкили факултети муштарак миёни МДТ “Донишкадаи сайёҳӣ, соҳибкорӣ ва хизмат” ва Донишгоҳи давлатии сайёҳӣ ва хизмати Россия гуфтушунид анҷом дода шуда, айни ҳол лоиҳаи созишномаи таъсиси факултети муштарак аз ҷониби шарики хориҷӣ баррасӣ шуда истодааст;
  • дар нимаи аввали соли 2020 ташрифи такрории коршиносони соҳаҳои сайёҳӣ ва меҳмондории кишварҳои хориҷа ба донишкада сурат гирифт. Дар баробари ин, вобаста ба паҳншавии бемории сироятии коронавирус аз ҷониби коршиносон-шарикони хориҷии донишкада моҳҳои март-апрели соли 2020 машғулиятҳои омӯзишӣ 3 маротиба тариқи онлайн сурат гирифтанд;

           Дар натиҷаи омӯзиши таҷрибаи Донишгоҳи илмҳои татбиқии Бредаи Нидерланд, Донишгоҳи гуманитарию ҳуқуқии Қазоқистон ва дигар донишгоҳҳои шарик ҳуҷҷатҳои менеҷменти сифати таҳсилот дар донишкада такмил дода шуданд.

           Ҳамчунин, дар ин давра бо шарикони хориҷӣ аз Донишгоҳи Портуи Португалия, Донишгоҳи илмҳои татбиқии Бредаи Нидерланд,         Донишгоҳи давлатии сайёҳӣ ва хизмати Россия, Донишгоҳи ҳуқуқшиносӣ ва илмҳои иҷтимоии Қазоқистон, Донишгоҳи авиатсионии Украина гуфтушунид анҷом дода шуд ва онҳо дар конфронси илмӣ-амалӣ дар чорчӯбаи барномаи грантии “Омодасозии кадрҳо бо ҳадафи рушди устувори сайёҳӣ дар Ҷумҳурии Тоҷикистон” тариқи онлайн фаъолона ширкат варзиданд.

   Вобаста ба самти фаъолияти тарбиявӣ ректори донишкада муҳтарам Асрорзода Убайдулло Саттор иброз доштанд, ки шуъбаи тарбия ва робита бо ҷомеаи донишкада дар шашмоҳаи аввали соли 2020 барои тақвияти корҳои тарбиявӣ як қатор чорабиниҳои фарҳангӣ-маърифатиро доир намуд.

   Бо мақсади тарбияи ҳисси ватандўстӣ, баланд бардоштани худшиносии миллӣ, ифтихори шаҳрвандии ҷавонон ва тарбияи ғоявӣ, сиёсӣ ва маърифатию фарҳангии насли наврас дар нимаи аввали соли  2020 зиёда аз 28 чорабинии тарбиявӣ баргузор гардиданд.

   Дар давраи ҳисоботӣ Донишкада ба Мактаб-интернати ҷумҳуриявии кўдакони ятими ноҳияи Сангвор ёрии худро амалӣ намуд. Дар ин  давра Донишкада ба Мактаб-интернати мазкур ба маблағи беш аз 10 000 сомонӣ маводи хӯрока ва конселярӣ харидорӣ карда, дастрас намуд.

   Инчунин, дар давраи авҷгирии бемории сироятии коронавирус аз тарафи раёсати донишкада ба 150 оилаи табибон ва кормандони муассисаҳои тиббии шаҳри Душанбе кӯмак расонида шуд.

    Дар партави сиёсати бунёдкорӣ ва созандаи Ҳукумати Ҷумҳурии Тоҷикистон ректори донишкада Асрорзода У.С. иброз доштанд, ки дар донишкада дар давраи ҳисоботӣ як қатор корҳои ободонӣ, таҷдиду сохтмонӣ ба анҷом расонида шуда, дар самти фаъолияти иқтисодию хоҷагидорӣ ва молиявии донишкада пешравиҳо ба назар мерасанд. Аз ҷумла:

  • дар нимаи аввали соли 2020 қарори Раиси шаҳри Душанбе муҳтарам Рустами Эмомалӣ “Дар бораи додани иҷозат барои сохтмони биноҳои таълимӣ дар ҳудуди қитъаи замини донишкада, воқеъ дар хиёбони Борбад 48/5, ноҳияи Фирдавсии шаҳри Душанбе” таҳти, №647 ба тасвиб расид ва дар асоси  қарори мазкур ҷиҳати дар сатҳи баланд ба анҷом расонидани ин сохтмони муҳими таълимӣ то имрўз корҳои муайян сурат гирифта истодаанд. Лоиҳаи биноҳои таълимӣ аз ташхиси техникӣ гузашт ва қарори оғози сохтмон ба имзо расид;
  • дар ин давра бо ташаббуси шуъбаи маъмурӣ-хоҷагидорӣ бо мақсади беҳдошти фаъолияти донишкада бо ташкилотҳои хизматрасонии шаҳри Душанбе шартномаҳо барои хизматрасонӣ  баста  шуданд;
  • дар ин давра, аз ҷониби масъулини корҳои маъмурӣ–хоҷагӣ беш аз 19 000 дона гулҳои гуногун ва 150 дарахтони мевадиҳанда шинонида шуданд;
  • пеш аз ҷашни Наврӯзи байналмиллалӣ тамоми деворҳои гирду атрофи донишкада, литсей ва ошхона рангубор карда шуд;
  • дар ин давра пайваста ҷиҳати пешгирӣ намудани бемории коронавирус, ки тамоми давлатҳои ҷаҳонро ба ташвиш овардааст, аз ҷониби раёсати донишҳкада 260 кг маҳлули хлор, беш аз 300 литр маҳлули антисептикӣ, таҷҳизоти зарурӣ харидорӣ карда шуда, ҳамзамон утоқҳои корӣ, синфхонаҳо, роҳравҳо бо маводҳои зарурӣ безарар гардонида шуданд. Дар ин самт, баҳри пешгирии ин бемории сироятӣ корҳо боз ҳам ҷоннок шуда истодаанд.

    Бо назардошти он ки дар донишкада литсейи равияи иқтисодӣ фаъолият менамояд, ректори донишкада дар гузориши хеш вобаста ба самти фаъолияти литсейи мазкур низ ибрози назар намуда, қайд карданд, дар  шашмоҳаи аввали соли 2020 роҳбарият ва омўзгорони литсейи донишкада тамоми малака ва нерўи худро баҳри баланд бардоштани сатҳу сифати таҳсилот, омўзиши фанҳои табиатшиносию дақиқ, мутолиаи асарҳои бадеӣ, омўзиши амиқи технологияи муосир равона намуданд.

    Дар ин давра дар литсей 719 нафар хонандагон ба таҳсил фаро гирифта шудааст, ки 233 нафари онҳоро духтарон ташкил медиҳад.

    Дар шашмоҳаи аввали соли 2020 дар литсей ҳафтаҳои фаннии  англисӣ, математика, физика гузаронида шуда, бо доир кардани конференсияҳо ва чорабиниҳои гуногун ҷамъбаст карда шуд.

      Айни замон дар литсей се нафар хонандагон аз фанҳои биология, ҳуқуқ ва забони тоҷикӣ дар озмуни шаҳрӣ ҷойҳои намоёнро соҳиб гардида, 2 нафар аз онҳо ба озмуни ҷумҳуриявӣ роҳхат гирифтанд.

    Инчунин, дар давраи ҳисоботӣ 2 нафар хонанда гирандаи стипендияи Президентӣ ва 1 нафар хонанда гирандаи стипендияи Раиси шаҳри Душанбе мебошад.

    Дар интиҳои нишасти матбуотӣ намояндагони васоити ахбори омма вобаста ба масоили омодасозии мутахассисони соҳаҳои сайёҳӣ ва соҳибкорӣ таваҷҷуҳ зоҳир намуда, ба саволҳои сершумори хеш аз масъулини сохторҳои таркибии донишкада посухҳои мушаххас гирифтанд.