Тоҷикӣ Русский English
logo

НАТИҶАҲО НАЗАРРАСАНД

        10 январи соли 2020 дар Донишкадаи соҳибкорӣ ва хизмати Вазорати саноат ва технологияҳои нави Ҷумҳурии Тоҷикистон ҳисоботи ректори Донишкада оид ба фаъолияти таълимию тарбиявӣ, илмию инноватсионӣ, равобити хориҷӣ  ва хоҷагидорию иқтисодӣ дар соли 2019 ва вазифаҳо барои соли 2020 шунида шуд.

        Дар раванди натиҷагирӣ аз фаъолияти солонаи донишкада намояндаи Вазорати саноат ва технологияҳои нави Ҷумҳурии Тоҷикистон Рузизода А.Ҳ. ва тамоми намояндагони сохторҳои донишкада ширкат варзиданд.

        Ректори донишкада, профессор Обидов Фозил Саидович дар радифи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, ки 26 декабри соли 2019 ироа гардида буд, изҳори назар намуда, дар заминаи Донишкадаи соҳибкорӣ ва хизмат таъсис додани Донишкадаи сайёҳӣ, соҳибкорӣ ва хизматро ҳамчун иқдоми наҷиби Ҳукумати кишвар дар самти омода намудани мутахассисони соҳаи сайёҳии ҷавобгӯи талаботи бозори меҳнат иброз доштанд. Инчунин, ректори донишкада қайд намуданд, ки барои кулли кормандону устодон ва донишҷӯёну хонандагони донишкада боиси ифтихор аст, ки маҳз Пешвои муаззами миллат дар раванди ироаи Паём ба донишкадаи мо изҳори назар намуданд.

        Сипас, ректори донишкада  бо истифода аз технологияҳои муосир тариқи истифодаи видеопроектор ҳисоботи солонаи хешро манзури ҳозирин гардонид (ҳисобот замима мегардад).

        Барои ҳайати илмӣ-омӯзгорӣ, кормандон ва донишҷўёни Донишкадаи соҳибкорӣ ва хизмати Вазорати саноат ва технологияҳои нави Ҷумҳурии Тоҷикистон соли 2019 давраи хотирмон ба ҳисоб меравад, зеро он бо ҳодисаҳои муҳими сиёсӣ, аз ҷумла таҷлили 28 — умин солгарди Истиқлолияти давлатии Ҷумҳурии Тоҷикистон, таҷлили 22-умин солгарди Рўзи Ваҳдати миллӣ, 27 — умин солгарди Иҷлосияи таърихии XVI-уми Шӯрои Олии Ҷумҳурии Тоҷикистон  ва дигар ҳодисаҳои иқтисодиву сиёсӣ алоқаманд мебошад.

        Дар давоми нимсолаи аввали соли 2019 бо мақсади иҷрои дастуру супоришҳои Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, ки аз Паёми навбатӣ ба Маҷлиси Олии Ҷумҳурии Тоҷикистон аз 26 –уми декабри соли 2018, аз вохўрии рўзи 26-уми июни соли 2019 дар ноҳияи Рашт ба муносибати Рӯзи ваҳдати миллӣ бармеоянд, аз тарафи раёсати донишкада нақшаҳои иловагӣ қабул карда шуда, маҷмўи корҳои ташкилӣ, илмӣ–методӣ барои пешрафти таълиму тарбия, баланд бардоштани сифати таҳсилот, тадқиқоти илмӣ, омодасозии кадрҳои баландихтисос, ҷалби донишҷўён ба корҳои илмӣ ва инноватсионӣ, густариши равобити хориҷӣ ва ободониву созандагӣ амалӣ карда шуданд.

        Ҳуҷҷатҳои иттилоотӣ доир ба иҷрои онҳо таҳия гардида, ба мақомоти дахлдор ирсол шуданд. Аз ҷумла, дар ин давра тавассути шуъбаи умумӣ ба донишкада  1122 мактуб ворид гардида, 1118 мактуби содиротӣ ирсол гардид.

               Шумораи мактубҳои воридотӣ ва содиротӣ дар соли 2019

НОМГЎИ ВАЗОРАТУ МУАССИСАҲОМАКТУБҲОИ ВОРИДОТӢМАКТУБҲОИ СОДИРОТӢ
Дастгоҳи иҷроияи Президенти Ҷумҳурии Тоҷикистон1918
Вазорати маориф ва илми Ҷумҳурии Тоҷикистон512270
Вазорати саноат ва технологияҳои нави Ҷумҳурии Тоҷикистон105114
Дигар муассисаву ташкилотҳо486716
Ҳамагӣ11221118

Ҳамчунин ба унвонии раёсати донишкада 967 адад ариза (шикоятӣ нест), 439 адад пешниҳод ва 293 дархост ворид гардидаанд, ки баъд аз таҳлилу баррасӣ ва иҷроиш ба мақомоти дахлдор ва шаҳрвандону донишҷўён саривақт дастрас гардонида шуданд.

                                 ФАЪОЛИЯТИ ШЎРОИ ОЛИМОНИ ДОНИШКАДА

        Шўрои олимони донишкада мақомоти олии идоракунӣ ба шумор рафта, бо фармоиши ректори донишкада дар ҳайати 23 нафар таъсис дода шудааст.

        Дар давраи ҳисоботӣ 13 ҷаласаи Шўрои олимони донишкада тибқи нақшаи корӣ ва 2 шӯрои ғайринавбатӣ доир гардид, ки дар он 132 масъала, аз ҷумла, 67 масъалаи асосӣ ва 65 масъалаи ҷорӣ мавриди баррасӣ ва муҳокима қарор дода шуд.

        Раёсати Донишкадаи соҳибкорӣ ва хизмат бо мақсади дастгирии ҳамешагии сиёсати Ҳукумати Ҷумҳурии Тоҷикистон, саривақт иҷро намудани дастуру супоришҳои Президенти мамлакат, муҳтарам Эмомалӣ Раҳмон, барои баланд бардоштани сифати таълиму тарбия ва корҳои илмӣ-таҳқиқотӣ, рушди робитаҳои беруна, инчунин фаъолияти инноватсионӣ дар соли 2019 ба як қатор дастовардҳо ноил гардид.

        Аз ҷумла, болоравии сатҳу сифати таълим ва корҳои илмию тадқиқотӣ нисбатан таъмин гардида, густариши робитаҳои беруна ва хориҷӣ, инчунин фаъолияти инноватсионӣ рӯ ба беҳбудӣ ниҳод.

                                                БАХШИ ТАЪЛИМ

        Мавриди зикр аст, ки айни замон дар 18 кафедраи донишкада 214 нафар омўзгор барои пешбурди фаъолияти таълимӣ-тарбиявӣ ҷалб шудаанд, ки аз онҳо 175 нафар омўзгори доимӣ ва ҳамкорони дохилӣ, 39 нафар омўзгори ҳамкори беруна мебошанд.

        Бо мақсади хубтар ба роҳ мондани раванди таълим ва ҷиҳати таъмини сифати таҳсилот дар соли 2019 тағйиротҳои назаррас ба амал омаданд. Аз ҷумла:

  • моҳи майи соли 2019 донишкада аз аттестатсия давлатӣ гузаронида шуда, барои 5 соли минбаъда барои пешбурди фаъолият дар самти омодасозии мутахассисон иҷозатнома дарёфт намуд;
  • дар ин давра бо қарори Шӯрои олимони донишкада аз 2-юми июни соли 2019 (таҳти №12/6.1) бо мақсади омодасозии кадрҳои баландихтисоси ҷавобгӯ ба талаботи меҳнат аз рӯйи ихтисосҳои риштаи сайёҳӣ, инчунин иҷроиши нақшаи чорабиниҳои “Солҳои рушди деҳот, сайёҳӣ ва ҳунарҳои мардумӣ” дар донишкада “Факултети сайёҳӣ” таъсис дода шуд;
  • ҷараёни таълим дар донишкада тибқи стандартҳои давлатии таълимии таҳсилоти олии касбӣ ва нақшаҳои таълимӣ, ки аз тарафи Вазорати маориф ва илми Ҷумҳурии Тоҷикистон тасдиқ шудаанд, сурат мегирад. Дар оғози соли таҳсили 2019-2020 дар донишкада ҳуҷҷатҳои меъёрӣ-ҳуқуқӣ, нақшаҳои таълимӣ барои 25 барномаи таълимӣ таҳия карда шудаанд, ки баҳри самаранок ба роҳ мондани раванди таълим мусоидат менамоянд;
  • дар ин давра барои 25 ихтисос стандартҳои давлатии таълимии ихтисосҳо ва нақшаҳои таълимӣ таҳия карда шуда, аз ташхиси Маркази ҷумҳуриявии таълимию методӣ гузаштанд. Нақшаҳои таълимӣ айни ҳол мавриди амал қарор дошта, стандартҳо бошанд  ба Вазорати маориф ва илми Ҷумҳурии Тоҷикистон барои тасдиқ пешниҳод гардидаанд;
  • дар соли 2019 теъдоди омӯзгорони соҳиби унвон ва дараҷаи илмӣ ба 87 нафар (21 доктори илм, профессор, 66 номзади илм, дотсент) расонида шуд. Танҳо дар соли 2019 — 5 доктори илм ва 8 номзади илм ба донишкада ба кори доимӣ ҷалб карда шуданд;
  • дар натиҷаи вохӯрӣ бо намояндагони Агентии мустақили аккредитатсия ва рейтинги Ҷумҳурии Қазоқистон дар Қазоқистон ва бо ибтикори Вазорати маориф ва илми Ҷумҳурии Тоҷикистон раёсати донишкада ба суроғаи Агентии мазкур ҷиҳати аз аккредитатсияи байналмилалӣ гузаронидани ихтисосҳои донишкада, аз ҷумла ихтисосҳои 1-250103 – “Иқтисодиёти ҷаҳонӣ”, 1-890101 – “Саёҳат ва меҳмондорӣ” ва 1-26020210 – “Менеҷмент дар соҳаи сайёҳии байналмилалӣ”, гурӯҳҳои таҳсилашон бо забони русӣ такроран дархост ирсол намуд ва дар ин самт корҳои омодагӣ ҷиҳати мустаҳкам намудани пойгоҳи моддӣ-техникӣ, таълимӣ-методӣ ва баланд бардоштани сифати таҳсилот сурат гирифта истодаанд.
  • барои қабули довталабон дар соли таҳсили 2020-2021 аз рӯи ихтисосҳои “Иқтисодиёт ва идора дар корхонаҳои хочагиҳои мехмонхона ва тарабхона”, “Аудит ва ревизия” ва “Иқтисодиёти истифодаи табиат” аз ҷониби Хадамоти давлатии назорат дар соҳаи маориф иҷозатнома дода шуд;
  • бо мақсади баланд бардоштани самаранокии фаъолият дар шароити низоми таҳсилоти фосилавӣ ба сохтори  ташкилӣ-идоракунии донишкада аз 30-юми августи соли 2019 тағйирот ворид карда шуда, шуъбаи ғойибона ва таҳсилоти фосилавӣ таъсис дода шуд;
  • барои таъмини раванди таълим бо китобҳои дарсӣ ба маблағи 120 000 сомонӣ китобҳои нав харидорӣ карда шуд;
  • дар давраи ҳисоботӣ бо мақсади мустаҳкамсозии пойгоҳи моддию техникии раванди таълим 10 адад принтер ва 80 адад компютер харидорӣ карда шуд;
  • дар давраи ҳисоботӣ пайваста мониторинги сифати таҳсилот дар курсҳои алоҳида аз фанҳои тахассусӣ гузаронида шуд. Аз ҷумла, тибқи натиҷаи мониторинги сифати таҳсилот, ки аз 23-юм то 10-уми декабри соли 2019 дар курсҳои чоруми ҳамаи ихтисосҳои донишкада гузаронида шуд, сатҳи азхудкунӣ 81,5%-ро ташкил дода, сифати таҳсилот нисбат ба натиҷаи  донишҷӯёни курси чоруми соли таҳсили гузашта  9,7 % баланд шудааст;
  • дар соли таҳсили 2019-2020 низ чун солҳои қаблӣ дар ду гурўҳи магистрӣ аз рўи ихтисоси “Иқтисодиёти ҷаҳон” таҳсил бо забони англисӣ ба роҳ монда шудааст. Дар баробари ин, шуруъ аз нимсолаи дуюми соли таҳсил як гуруҳи забони таҳсилаш англисӣ аз ҳисоби донишҷӯёни зинаи бакалаври ихтисоси “Иқтисодиёти ҷаҳон” таъсис дода мешавад;
  • тибқи тақвими академӣ аттестатсияи хатми соли 2019 моҳҳои май — июни соли 2019 баргузор гардид. Соли 2019 589  нафар   аз рӯи 13 ихтисос дар зинаи бакалавриат донишкадаро хатм намуданд. Аз ин ҳисоб  15 нафар ё 2,5% соҳиби дипломи аъло  гардиданд.   8 нафар ба аттестатсияи давлатии роҳ наёфтанд ва 17 нафар хатмкунандагон ба аттестатсияи давлатии хатм ҳозир нашуданд. Ҷамъи хатмкардагон 564 нафарро ташкил медиҳад.

         Ҳамин тавр, раёсат, ҳайати профессорону омӯзгорон ва кормандони донишкада пайваста кӯшиш менамоянд, ки сифати таҳсилот беҳтар гардад. Барои иҷрои ин вазифа на танҳо пойгоҳи устувори моддӣ-техникӣ ба вуҷуд оварда шудааст, балки маҷмўи чорабиниҳои ташкилӣ, методӣ, кадрӣ амалӣ гардидаст, ки дар натиҷа сифати таълим то андозае боло рафтааст.

                                         БАХШИ ИЛМ ВА ИННОВАТСИЯ

         Дар соли 2019 дар самти фаъолияти илмӣ-тадқиқотӣ ва фаъолияти инноватсионӣ дар донишкада корҳои зиёде анҷом дода шудаанд. Дар ин давра олимон ва устодони донишкада нисбат ба дигар солҳо дар гузаронидани тадқиқоти илмӣ, таълифи монографияҳо, китобҳои дарсӣ, васоити таълимӣ, дастурҳои таълимию методӣ, ташкили чорабиниҳои гуногуншакли илмӣ ва ҳамзамон иштирок дар чорабиниҳои илмии сатҳҳои мухталиф нақши назаррас гузоштанд. Ҳамин тавр, донишкада дар соли 2019 вобаста ба фаъолиятҳои илмӣ ба як қатор дастовардҳо ноил гардид, аз ҷумла:

  • дар ин давра 23 монографияи илмӣ, 7 китоби дарсӣ, 15 васоити таълимӣ, 34 дастури методӣ, 4 рисолаи илмӣ, 705 мақолаи илмӣ (аз ҷумла 110 мақолаи илмӣ дар маҷаллаҳои илмии аз ҷониби КОА назди Президенти Ҷумҳурии Тоҷикистон тақризшаванда ва 68 мақолаи илмӣ дар маводи конфронсҳои байналмилалӣ) ва дар маҷмӯъ 788 номгӯй мавод нашр гардид. Ба ғайр аз ин, дар соли ҷорӣ бо дастгирии роҳбарияти донишкада, зиёда аз 2796 нусха китобҳо ба китобхонаи илмии донишкада ворид карда шуданд;
  • омодасозии кадрҳои баландихтисоси дорои дараҷа ва унвони илмӣ яке аз самтҳои афзалиятноки фаъолияти донишкада ба ҳисоб меравад, ки дар соли 2019, 5 нафар устодони донишкада рисолаҳои номзадии худро ҳимоя намуданд. Инчунин, 7 нафар устодони донишкада ҳимояи пешдифоиро аз кафедраҳо гузашта, ба Шӯроҳои диссертатсионӣ рисолаҳои илмии худро пешниҳод намуданд.
  • соли 2019 6 нафар устодони донишкада унвонҳои илмии дотсенти кафедраро соҳиб гардиданд. Аз тарафи 5 нафар устоди донишкада ҳуҷҷатҳо барои баррасӣ ва сазовор гардидан ба унвони дотсенти кафедра ба КОА назди Президенти Ҷумҳурии Тоҷикистон ирсол карда шудаанд.
  • лоиҳаи илмӣ-таҳқиқотии маблағгузоришаванда дар мавзуи “Ҳалшавандагии масъалаҳои канорӣ ва омехта барои баъзе синфҳои муодилаҳои дифференсиалӣ” (роҳбари лоиҳа профессор М.Исматӣ) амалӣ гардид;
  • дар соли 2019 бо мақсади амалисозии нақшаи дурнамои таҳқиқоти илмӣ, ба масъалаи татбиқи амалии нақшаҳои дурнамо ва омода кардани кадрҳои илмӣ — педагогӣ диққати ҷиддӣ дода шуд. Дар бахши магистратура ва докторантура айни замон 43 нафар докторантон аз рӯи ихтисос (PhD), 2 нафар аспирантон ва 2 нафар унвонҷӯён таҳсил карда истодаанд.
  • тибқи иҷозатномаи Хадамоти давлатии назорат дар соҳаи маориф, теъдоди қабули докторантон аз рӯи ихтисос (PhD) дар донишкада дар соли ҳисоботӣ ба 40 нафар расонида шуд;
  • дар даври хотимавии олимпиадаи фаннии донишҷӯёни мактабҳои олӣ, ки  3-4 майи соли 2019 дар Донишгоҳи давлатии молия ва иқтисоди Тоҷикистон баргузор гардид, 1 нафар сазовори ҷойи сеюм ва 2 нафар сазовори ҷойи ифтихорӣ гардиданд.
  • донишкада дар озмуни беҳтарин гӯшаи сайёҳӣ миёни макотиби олии кишвар, дар Форуми 2-юми донишҷӯёни сайёҳии МТОК-и Ҷумҳурии Тоҷикистон, ки дар Донишгоҳи давлатии тиҷорати Тоҷикистон доир гардид, сазовори ҷойи 1-ум гардид.

        Яке аз самтҳои муҳими фаъолияти донишкада, ташкил ва баргузор намудани конфронсҳо, симпозиумҳо, форумҳо, семинарҳои илмӣ-назариявӣ, мизҳои мудаввар ва дигар чорабиниҳои илмӣ маҳсуб меёбад. Бо мақсади иҷроиши ин самти фаъолият, соли 2019 дар донишкада дар ҳамкорӣ бо мақомотҳои гуногуни давлатӣ 1 конфронси байналмилалӣ, 6 конфронси ҷумҳуриявӣ, 1 конфронси донишкадавӣ, 2 ҳамоиши илмӣ, 10 семинари илмӣ-назариявӣ, 12 мизи мудаввар  ва 9 чорабиниҳои гуногуншакли илмӣ баргузор гардид, ки оид ба натиҷаи ҷамъбасти онҳо бо хулосаю пешниҳодот ба мақомоти дахлдор маълумотнома фиристода шуд.

        Парки инноватсионию технологии донишкада имрӯз бо фарогирии курсҳои кӯтоҳмудати омӯзишӣ аз рӯи самтҳои адрасбофӣ, атласбофӣ, қолинбофӣ, дузандагӣ, қаннодӣ, заргарӣ, кошонаи ҳусн, ҳунарҳои бадеии халқӣ, забони хитоӣ, курсҳои компютерӣ фаъолияти худро ба роҳ мондааст. Айни замон дар назди Парки инноватсионию технологии донишкада курсҳои кутоҳмудат аз рӯи ихтисосҳои “Дӯзандагӣ” ва “Қаннодӣ” ташкил карда шуда, барои ташкили курсҳои “Ороишгари мӯй” ва “Асосҳои омӯзиши компютер” синфхонаҳои махсуси бо воситаҳои зарурӣ муҷаҳҳаз ташкил карда шудааст.

 

                                 БАХШИ РОБИТАҲОИ ХОРИҶӢ

        Робитаҳои хориҷии донишкада низ дар ин давра бо донишгоҳу донишкадаҳо ва марказҳои илмӣ-таҳқиқотии ватанию хориҷӣ густариш ёфтанд. Дар соли 2019 донишкада бо 22 муассисаи хориҷӣ шартномаҳои ҳамкорӣ ба имзо расонид.

        Роҳбарияти донишкада барои сафарбар намудани омўзгорону донишҷўён  дар чорабиниҳои гуногуни хориҷӣ ва ватанӣ саҳми хешро гузошт:

  • дар доираи ҳамкориҳои байналмилалӣ бо макотиби олӣ ва муассисаҳои илмӣ дар соли 2019 дар баробари ширкат варзидани аксар омўзгорону олимони донишкада дар конфронсҳои сатҳи ҷумҳуриявӣ ва байналмилалӣ дар Тоҷикистон, инчунин ба кишварҳои Федератсияи Россия, Ҷумҳурии халқии Чин, Ҷумҳурии Қирѓизистон, Ҷумҳурии Қазоқистон ва Ҷумҳурии Ӯзбекистон сафари корӣ ва илмӣ анҷом дода, дар курсҳои такмили ихтисос, форумҳо, конфронсу симпозиумҳо иштирок ва маърўза намуданд;
  • дар ин давра 18 нафар омӯзгори донишкада 20 маротиба сафарҳои хориҷӣ анҷом дода, ҷиҳати иҷроиши муқаррароти созишномаву шартномаҳои ҳамкорӣ бо шарикони хориҷии донишкада саҳми худро гузоштанд;
  • моҳи апрели соли 2019 ҳайати омӯзгорони донишкада ҷиҳати табодули таҷриба ба Донишгоҳи давлатии туризм ва сервиси Россия (РГУТиС) ташриф оварданд ва дар доираи ҳамкориҳои устувору гуногунҷанбаи ҷонибҳо, бо қарори роҳбарияти муассисаи мазкур Донишкадаи соҳибкорӣ ва хизмат ба ҳайси шарики стратегии ин мактаби олии риштаи сайёҳӣ ва сервиси Федератсияи Россия пазируфта шуд;
  • дар доираи созишномаи ҳамкорӣ, инчунин шартномаҳои иловагӣ ба созишномаи мазкур гурӯҳи 13 нафараи омӯзгорону донишҷўён барои иштирок дар Лагери тобистонаи омўзишии Донишгоҳи давлатии туризм ва сервиси Россия ба шаҳри Маскав фиристода шуданд.
  • дар баробари лоиҳаи маблағгузоришаванда дар мавзуи “Омода намудани кадрҳо бо мақсади рушди устувори туризм дар Ҷумҳурии Тоҷикистон” (менеҷери лоиҳа, дотсент Қодирова М.И.) боз як лоиҳаи дигар дар чорчӯбаи Лоиҳаи “Рушди таҳсилоти олӣ дар Тоҷикистон” таҳти унвони “Баланд бардоштани сифати таҳсилот дар асоси истифодабарии муҳити иттилоотию таҳсилотии электронӣ дар Донишкадаи соҳибкорӣ ва хизмат” бо маблағгузории ҳудуди 2 млн. 697 ҳазору 604 сомонӣ тибқи натоиҷи арзёбӣ ба фаъолият шуруъ намуд;
  • дар ин давра масъулини донишкада бо намояндагони як қатор муассисаҳои таҳсилотии олии Ҷумҳурии Полша вохўриҳои судманди дуҷониба анҷом дода, бо 8-тои онҳо барои бастани шартномаҳои ҳамкорӣ ба мувофиқа расидаанд;
  • дар ин давра даъват намудани олимон аз муассисаи таҳсилоти олии касбӣ ва муассисаҳои илмии хориҷи дуру наздик бо мақсади таҷрибаивазкунӣ ва хондани лексия ба Донишкадаи соҳибкорӣ ва хизмат аз рӯи имкониятҳои мавҷуда сурат гирифт. Дар ин давра, 6 нафар олимон аз муассисаҳои таълимии хориҷӣ ба донишкада ташриф оварданд. Аз ҷумла, директори Институти технологияҳои муҳандисии Донишгоҳи давлатии Кемерово профессор Бородулин Дмитрий Михайлович, намояндагони Донишгоҳи соҳибкорӣ ва маъмуриятт Ҷумҳурии Полша – Виктория Левчук ва Ҳанна Узефович, профессорони Донишгоҳи Бредаи Нидерланд ва Донишгоҳи Портои Португалия Тео ван де Лаар ва Педро Бритто, инчунин омӯзгори Донишгоҳи ҳуқуқшиносии Қазоқистон Рушан Мухамеджанова
  • яке аз рӯйдодҳои муҳими донишкада дар ин самти дар он аст, ки дар соли 2019 донишкада шомили Ассотсиатсияи донишгоҳҳои Осиё гардид.

                                                БАХШИ ТАРБИЯ

        Раёсати донишкада баҳри иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти кишвар, муҳтарам Эмомалӣ Раҳмон ба тарбияи ватандустӣ, баланд бардоштани худшиносии миллӣ, ифтихори шаҳрвандии ҷавонон диққати ҷиддӣ дода, дар соли 2019 барои тақвияти корҳои тарбиявӣ як қатор чорабиниҳои фарҳангӣ-маърифатӣ гузаронид.

         Яке аз самтҳои асосии фаъолияти кормандони қисми тарбия назорати ҷиддӣ дар биноҳои таълимӣ дар байни донишҷўён ҷиҳати аз ҷониби онҳо риоя гардидани талаботи бо мошинҳои шахсӣ ва телефонҳои мобилӣ ба дарс наомадани донишҷўён ва иҷрои талаботи Дастурамали либосҳои тавсиявӣ мебошад.

         Дар ин ҷода раёсати донишкада  барои пешгирии ҳодисаҳои номатлуб дар донишкада якчанд ҷаласаҳои васеи ҳайати устодону кормандон ва донишҷўёни донишкада бо намояндагони мақомотҳои қудратӣ (кормандони Прокуратураи Генералӣ, Вазорати корҳои дохилӣ, Бозрасии давлатии автомобилӣ, Агентии назорати молиявии давлатӣ ва мубориза ба зидди коррупсия, Кумитаи амнияти миллии Тоҷикистон, Кумитаи назорати маводҳои мухаддири назди Президенти Ҷумҳурии Тоҷикистон, Адибон ва ѓайраҳо) баргузор карда шуд.

        Яке аз самтҳои фаъолият дар донишкада баланд бардоштани маънавиёт ва ҷаҳонбинии донишҷўён дар ҳамкории муштарак бо намояндагони васоити ахбори умум ва бо ҷалб намудани донишҷўён ба барномаҳои ахлоқию тарбиявӣ ва чорабиниҳои сиёсию фарҳангӣ мебошад. Донишҷўёни донишкада бо барномаҳои телевизионии Шабакаи аввали Телевизиони Тоҷикистон, Муассисаи давлатии Телевизиони Сафина, барномаҳои гуногуни телевизиони “Ҷаҳоннамо” ва “Баҳористон” ва ҳамзамон барномаҳои радиоӣ ҳамкории зич доранд. Ба таври пайваста муҳаққиқону коршиносон ва олимони соҳавии донишкада дар барномаҳои телевизионӣ ширкат намуда, андешаронӣ мекунанд.

         Илова бар ин, бо мақсади иҷрои талаботи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» комиссия таъсис дода шуда, ба таври пайваста дар байни ҳайати бисёрҳазорнафараи устодону кормандон ва донишҷўён корҳои тарѓиботию фаҳмондадиҳӣ бурда мешавад.

        Бо мақсади тарбияи ҳисси ватандўстӣ, баланд бардоштани худшиносии миллӣ, ифтихори шаҳрвандии ҷавонон ва тарбияи ѓоявӣ, сиёсӣ ва маърифатию фарҳангии насли наврас дар давоми соли 2019 сипаригашта зиёда аз 40 чорабиниҳои тарбиявӣ баргузор карда шуданд.

        Ҳамин тавр,  дар соли хониши 2019 то инҷониб кормандони қисми тарбия дар самтҳои гуногун фаъолият намуда, барои дар замири донишҷўён бедор намудани ҳисси ватандўстӣ, ифтихори миллӣ, арҷгузорӣ намудан ба муқаддасоти миллӣ, худшиносиву худогоҳӣ ва ҳуввияти миллӣ кўшишҳои зиёд ба харҷ дода, дар дарсҳои тарбиявӣ мунтазам барои амалисозии ин мақсади наҷиб корҳои назаррас ба анҷом расонида истодаанд ва тасмим гирифтаанд, ки минбаъд низ мувофиқ ба талаботи рўз корҳои тарбиявиро ба роҳ монда, барои дар амал татбиқ намудани сиёсати маорифпарварони Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам, Эмомалӣ Раҳмон корҳои амалӣ андешанд.

 

                        БАХШИ ИҚТИСОДИЮ ХОҶАГИДОРӢ ВА МОЛИЯВӢ

         Ҷиҳати татбиқи амалии сиёсати бунёдкорӣ ва созандаи Ҳукумати Ҷумҳурии Тоҷикистон ва дастуру супоришҳои бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар донишкада силсилаи корҳои ободонӣ, таҷдиду сохтмонӣ ба анҷом расонида шуда, дар самти фаъолияти иқтисодию хоҷагидорӣ ва молиявии донишкада пешравиҳои шоён  ба назар мерасанд.

        Пардохти музди меҳнати кормандон дар донишкада аз руйи басти кории тасдиқгардида ва нақшаи маблағгузорӣ аз ҳисоби буҷети давлатӣ ва суратҳисоби махсус ба роҳ монда шуда, музди меҳнати миёнаи ҳайати кормандони донишкада дар соли 2019 – 2305 сомониро ташкил дод.

        Дар давраи ҳисоботӣ барои истифодаи донишҷўёну устодон ошхонаи нав барои 60 ҷойи нишаст дар як вақт, толори нави маҷлисгоҳ ва машғулиятҳои лексионӣ барои 120 ҷойи нишаст сохта ба истифода дода шуд. Ҳамзамон толор –қироатхонаи китобхонаи илмии донишкада ба тозагӣ таъмир шуда, шумораи ҷойҳои нишаст дар он ба 150 адад расонида шуд.

        Дар ин давра барои мустаҳкам намудани пойгоҳи моддӣ-техникӣ ва самаранок ба роҳ мондани раванди таълим ҷевонҳои китобмонӣ-10 адад, мизҳои конфронсӣ-5 адад, минбар 6 адад, мизу курсиҳои ошхона барои 60 ҷойи нишаст  харидорӣ карда шуд.

        Тибқи Амри Президенти Ҷумҳурии Тоҷикистон аз 10 феврали соли 2014, № АП-159 бо мақсади ба низом даровардани раванди кўмакрасонии доимии хайрия ба муассисаҳои махсуси томактабӣ, мактабӣ, статсионарӣ, табобатӣ ва дигар муассисаҳои хизматрасонии иҷтимоӣ, вазорату идораҳо ва муассисаҳо мувофиқи рўйхат вобаста карда шудаанд. Тибқи рўйхати мазкур Донишкада ба Мактаб-интернати ҷумҳуриявии кўдакони ятими ноҳияи Сангвор ёрии худро дар асоси дархости муассисаи мазкур амалӣ менамояд.

        Ҳамчунин бо фармоиши ректори донишкада донишҷӯёни ятими кулл (3 нафар) пурра аз маблағи таҳсил озод карда шудаанд.  Ҳамзамон, бо ибтикори раёсати донишкада ба ятимони кулл барои харидории сарулибос ва таҷҳизоти хониш кӯмакҳои иловагӣ муқаррар карда шудааст..

         Инчунин, бо фармоиши ректори донишкада барои фарзандони оилаҳои камбизоат  имтиёз дар шаклҳои гуногун муайян карда шудааст.

         Аз моҳи январ  то имруз  ҷиҳати амалӣ намудани  корҳои созандагию  ободонӣ,   кабудизоркунӣ, ниҳолшинонӣ, тоза намудани биноҳо ва гирду атрофи донишкада тозаву озода намудани ҳавлиҳои назди донишкада, синфхонаҳои таълимӣ ва таъмин намудан бо маводҳои зарурӣ барои пешбурди фаолияти таълимию тарбиявӣ ва ғайраҳо корҳои муайянеро  ба анҷом расонидааст

        Вазифаи асосии қисм тозаву озода намудани  гирду атрофи донишкада, тоза кардани утоқҳои корӣ ва синфхонаҳо, инчунин корҳои таъмиру тармим мебошад.

        Тамоми биноҳои  донишкада, алалхусус масъалаҳои системаҳои барқӣ  ва системаҳои  обӣ зери назорати қатъии қисми хоҷагидорӣ  донишкада қарор дорад.

         Дар бахши хоҷагидорӣ як зумра корҳои таъмирию сохтмонӣ ба анҷом расонида  шуд:

-таъмири  китобхона, таъмири толори хониш, сохтмони бинои ошхона, ободонии гирду атрофи ошхона, аз таъмир баровардани утоқҳои кории коргарони хоҷагидорӣ.

-сохтмони асосии анбори  донишкада, рангу бор ва тоза кардани   партовгоҳи донишгоҳ, таъмир курсиҳои синфхонаҳо;

-таъмири зеристгоҳи  барқӣ ва ба кор даровардани зеристгоҳи эҳтиётии барқӣ, пайваст намудани  ноқили баландшидат то ошхона ва монанди инхо.

        Дар ҷои  тавақуфгоҳи  мошинҳо як анбори калон барои молу анволи донишкада сохта ба истифода дода шуд. Дар ҳавлӣ ва роҳравҳои донишкада барои фасли тирамоҳу зимистон гулҳои мавсимӣ шинонида шуданд.

        Дар баробари ҳамаи ин, қисми хоҷагидории донишкада мунтазам ҷаҳду талош менамояд, ки синфхонаҳо, утоқҳои корӣ, роҳраву ҳавлиҳо, гулгаштҳои донишкада ҳамеша тозаву озода ва ба равнди таълиму тарбия мувофиқ бошанд.

 

                     ЛИТСЕЙИ ДОНИШКАДАИ СОҲИБКОРӢ ВА ХИЗМАТ

        Литсейи Донишкадаи соҳибкорӣ ва хизмат соли 2019-ро дар шароити хуби таҳсил оѓоз намуд. Дар литсейи донишкада барои таҳсили хонандагон тамоми шароитҳо муҳайё карда шудааст.

        Дар ин давра шумораи хонандагон 719 нафарро ташкил менамояд, ки аз онҳо 232 нафарашон духтарон мебошанд.

        Дар байни онхо 3 нафар хонандагони литсей гирандаи “Стипендияи Президентӣ”, 1 нафар гирандаи “Стипендияи Раиси шаҳр”ва 5 нафар дорандаи “аттестати аъло”-и маълумоти миёнаи асосӣ мебошанд, ки фахри литсей мебошанд.

        Дар даври якуми олимпиадаи дохилилитсейӣ, ки 315 нафар хонандагон иштирок намуданд, 72 нафар ғолибиятро ба даст оварда, дар даври II-юми ноҳиявӣ иштирок намуданд.

        Дар даври II-юми олимпиадаи  ноҳиявӣ 20 нафар ғолибиятро ба даст оварда, ба даври III-юми олимпиадаи шаҳрӣ роҳхат гирифтанд.

        Рӯзҳои 2- 3 юми январ ғолибон дар даври сеюми иштирок намуданд ва умедворем, ки натиҷаҳои хуб ба даст меоранд.

        Инчунин, дар литсей озмун аз руйи номинатсияҳои “Хушнависӣ — зебопарастист”, “Ман зебо менависам” ва “Қалами сабз” баргузор гардидл, ки дар озмуни “Бехтарин хушнавис”48 нафар хонандагони синфҳои 1-11 иштирок намуда, 8 нафар ғолибиятро ба даст оварданд ва барои иштирок дар давраҳои минбаъда роҳхат гирифтанд.

        Нимсолаи I-уми соли хонишро дар литсей 719 нафар чамъбаст намуданд. Дар натиҷа баҳои миёнаи азхудкунӣ дар литсей 4,4 буда, 88%-ро ташкил медиҳад.

        Ба пешравиҳои дар боло зикргардида нигоҳ накарда, муаммову норасоиҳои зиёде мавҷуданд, ки бартараф намудани онҳо барои боз ҳам баланд бардоштани сатҳи сифати таҳсилот имконият фароҳам месозанд.

        Бинобар ин зарур аст, ки аз тарафи сохторҳои таркибии донишкада дар соли 2020 тадбирҳои мушаххас андешида шаванд.

         Аз ҷумла, дар бахши таълим:

  1. Бо ҳадафи тақвияти диққати омӯзгорон ба корҳои мустақилонаи донишҷўён, ҳамчунин шаклҳои назорати ҳафтаинаи корҳои мустақилонаи донишҷӯён аз рўи фанҳо тадбирҳои судманд андешида шавад;
  2. Барои таълифи китобҳои дарсии бахши 3 ва 4 нақшаи таълимии ихтисосҳо тадбирҳои амалӣ андешида шавад. Зеро аз рӯи тамоми ихтисосҳои амалкунанда норасоии китобҳои дарсӣ ва васоити таълимӣ дида мешавад;
  3. Ҷиҳати аз аккредитатсияи байналмилалӣ гузаронидани ихтисосҳои 1-250103 – “Иқтисодиёти ҷаҳонӣ”, 1-890101 – “Саёҳат ва меҳмондорӣ” ва 1-26020210 – “Менеҷмент дар соҳаи сайёҳии байналмилалӣ”, гурӯҳҳои таҳсилашон бо забони русӣ корҳои омодагиро ҷоннок намуда, ҷиҳати мустаҳкам намудани пойгоҳи таълимӣ-методӣ ва баланд бардоштани сифати таҳсилот тадбирҳои судманд андешида шавад;
  4. Ҷиҳати баланд бардоштани сатҳи забономӯзӣ ва иҷроиши “Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои солҳои 2015-2020” тадбирҳои зарурӣ роҳандозӣ ва амалӣ карда шаванд;
  5. Бо эълон гардидани солҳои 2020 -2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” омӯзиши илмҳои табиатшиносӣ, дақиқ ва риёзӣ боз ҳам беҳтар ба роҳ монда шавад.

          Дар бахши корҳои илмӣ-таҳқиқотӣ ва инноватсионӣ:

  1. Барои омодасозии кадрҳои дорои дараҷа ва унвонҳои илмӣ аз ҳисоби омӯзгорони ҷавони донишкада тибқи нақшаи дурнамо тадбирҳои зарурӣ андешида шавад:
  2. Баҳри ҷалби омӯзгорону донишҷӯён ба фаъолияти инноватсионӣ тадбирҳои судманд андешида шавад:
  3. Доир ба васеъ намудани самтҳои фаъолияти парки инноватсионию технологии донишкада чораҳои зарурӣ андешида шавад ва дар ҳамкорӣ бо корхонаҳои зертобеи Вазорати саноат ва технологияҳои нави ҶТ барномаҳои инноватсионӣ амалӣ гардад.

          Дар самти равобити хориҷӣ:

  1. Ҷиҳати тақвияти ҳамкориҳо дар доираи созишномаҳои ба имзо расонидашуда тадбирҳои зарурӣ андешида шавад;
  2. Ташаббуси кафедраҳо дар самти ба роҳ мондани робита бо муассисаҳои таълимӣ ва илмии кишварҳои хориҷӣ ва ҳамроҳ шудан ба лоиҳаҳои байналмилалӣ пурзӯр карда шавад;

         Дар бахши корҳои тарбиявӣ:

  1. Барои баланд бардоштани ҳисси худшиносии миллӣ, ватандўстӣ ва маърифатнокии донишҷўён пайваста бо онҳо суҳбату мулоқотҳо ташкил карда шавад;
  2. Деканати факултетҳо ва мудирони кафедраҳо вазифадор карда шаванд, ки ҷараёни татбиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд»-ро зери назорати қатъӣ қарор диҳанд;

         Дар бахши иқтисодию хоҷагидорӣ ва молиявӣ

  1. Фаъолияти маъмурони биноҳои таълимиро оид ба истифодаи самараноки қувваи барқ ва риояи қоидаҳои зидди сўхтор пурзўр намоянд;
  2. Ҳолати синфхонаҳои таълимӣ, ҷобаҷогузории мизу курсиҳо ва воситаҳои техникии раванди таълим таҳти назорати ҳаррӯза қарор дода шавад;

         Дар литсейи донишкада:

  1. Назорати сатҳу сифати дарсҳоро пурзўр намуда, ҷиҳати баланд намудани натиҷаҳои таҳсилот истифодаи усулҳои фаъоли таълим ва технологияи муосирро бештар ба роҳ монанд;
  2. Барои мунтазам ба роҳ мондани санҷиши дафтарҳо ва рӯзномаҳои хонандагон аз тарафи омўзгорон тадбирҳои судманд андешида шавад.

        Ҳамин тариқ, тавре бармеояд, вазифаҳои мазкур хеле муҳим ва қобили аҳамияти хос мебошанд. Ҳалли онҳо кўшишу заҳмати зиёдеро талаб мекунад, вале ин вазифаҳо амалишавандаанд ва сохторҳои алоҳидаи донишкадаро зарур аст, ки ҷиҳати амалисозии онҳо тадбирҳои зарурӣ андешанд.